黃心穎出席《宮心計2深宮計》活動。（陳順禎攝）
《美女廚房》第1集有黃心穎做嘉賓上節目煮食，相信有睇過節目觀眾都對她的「炸雞味炸蝦」以及「勁咸粉絲」嘆為觀止。黃心穎接受《香港01》訪問時說：「首先好犀利嘅係，炸蝦變咗炸雞味，而入面係冇雞嘅成份。個蟹其實係好好食㗎，但係個粉絲就真係好難食，咸到我返屋企飲好多水都仲feel到咸味，哈哈，辛苦晒啲評判同主持。不過我好開心可以上到呢個節目，因為我覺得我已經開創咗我煮嘢嘅小宇宙。」
賣相真你唔多好。（電視截圖）
問到黃心穎的男朋友馬國明有沒有試過她的手勢時，她說：「佢完全冇試過，因為我係冇煮過嘢俾人食㗎，但係今次我係用咗好多勇氣去踏出呢一步。以前煮嘢食節目我係唔去㗎，因為我煮嘢食係0知識。不過碟餸成型嘅時候我已經好開心。」她續說：「我都同佢講播咗啦，不過千祈唔好睇，我有warn到佢㗎。（佢有冇煮過嘢俾你食？）冇，佢都唔識煮嘢，所以呢件事上面我哋係打和。」
黃心穎話碟嘢勁咸。（電視截圖）
黃心穎表示自己也有觀看，覺得十分好笑。不過心穎對網民負評並不是十分認同：「我自己睇返都笑到喀喀聲，我有睇網上conment，大部份都係對我廚藝另眼相看，哈哈哈。雖然我廚藝唔好，但係可以娛樂到大家已經係好開心。（但係網民話主持做得差喎。）第1，2輯咁成功，其實佢哋都有壓力㗎，同埋所有嘢都要warm up㗎嘛，所以網民對佢哋都苛刻咗少少。我已經覺得佢哋做得好好，我自己就覺得好好笑。」